Nënshkruhet marrëveshje bashkëpunimi midis AZHB-së dhe Fakultetit të Inxhinierisë Mekanike të UP-së

25.03.2025 Prishtinë

       Drejtori Ekzekutiv i Agjencisë për Zhvillimin e Bujqësisë, z. Luan Sylaj, u prit nga Dekani i Fakultetit të Inxhinierisë  Mekanike/UP, z. Mirlind Bruçi, me ç’rast, kanë nënshkruar marrëveshje bashkëpunimi, me qëllim përcaktimin e kuadrit të marrëdhënieve të bashkëpunimit midis FIM-UP dhe Agjencisë për Zhvillimin e Bujqësisë, në fushën e mësimdhënies dhe të kërkimit shkencor. 

Kjo marrëveshje do të sigurojë shkëmbimin e vazhdueshëm të informacionit mbi organizimin e zhvillimin e fakultetit të FIM dhe MBPZHR, në fushën e bashkëpunimit, me qëllim të rritjes së cilësisë së arsimit dhe të bashkëpunimit në projekte të përbashkëta. 

Palët do të inkurajojnë dhe mbështesin pjesëmarrjen e kërkuesve shkencor të të dy institucioneve në tematika dhe problematika studimore dhe kërkimore të përbashkëta me interes reciprok. Fakulteti i Inxhinierisë do të angazhohet në ofrimin e ekspertizës për Fakultetin e Bujqësisë në fusha të ndryshme, me ç’rast do bëjë vlerësimin e pajisjeve makinerike të MBPZHR-së, vlerësimin e konstruksioneve makinerike, vlerësimin profesonal të veglave dhe pajisjeve bujqësore, vlerësimin e cilësisë së vajrave dhe antifrizit, testimin e materialeve me shkatërrim dhe pa shkatërrim, si dhe testime e vlerësime të tjera, varësisht nga kërkesat e MBPZHR/AZHB-së.

Po ashtu, synim i marrëveshjes është edhe përkushtimi në drejtim  të krijimit të hapësirave për praktika dhe punësim, përsosjen e aftësive profesionale të studentëve dhe të diplomuarve të FIM si dhe angazhimin në hulumtime dhe projekte të përbashkëta shkencore, vendore dhe ndërkombëtare.